पित्रपक्षःः श्राद्ध

 

।ःःःःःःपित्र पक्षःःःः श्राद्ध ःःःःःः।।
         ःःःःःःःःःःःःःःःःःः

ऐगि पित्र पक्ष पित्रू कू, काक पूड़ि देण कू,
सच्ची पित्र भक्ति कू, झूठा दिखावा कन कू।।

सम्पयू गफ्फा दे नी, एक टिक्कुड़ु भी गोरा लेख,
घी दूध सुपन्यौं कि छुईं, एक चा कुलि भी दे फेंक,
आज श्राद्धौ खीर पूरी पूड़ि, लोखू  का देखा देखी।।
ऐगि पित्र पक्ष पित्रू कू, काक पूड़ि देण कू,....

जिन्दा रैंदू ब्बे बब्बू कभी, ब्बे बाब नी बोली,
गालि, डांट फटकारा सिवै, गिचु नि खोली,
श्राद्धा दिन, पित्र देवाय नमोः जोर से बोली।।
ऐगि पित्र पक्ष पित्रू कू, काक पूड़ि देण कू,....

ठंडियूं  राति ब्बे बाब, बिना खंतड़ि गुदिड़ि रैनि,
तन ढकौणू, पुरणा धुरणा कपड़ा भी नि पैनी,
श्राद्धा दिन नया कपड़ा लता, पित्र्वा निपतौ देनी।।
ऐगि पित्र पक्ष पित्रू कू, काक पूड़ि देण कू,.......

जिन्दा ब्बे बब्बू सेवा से बढ़कर, नी क्वी पुण्य काम,
श्रवण कुमार जन बेटा मानला ब्बे बब्बू  प्रभु समान,
जिन्दा ब्बे बब्बू खलयू जनु नी, पित्र काक पूड़ियू दान।।
ऐगि पित्र पक्ष पित्रू कू, काक पूड़ि देण कू,.........

करा ब्बे बब्बुई सेवा, अभी भी वक्त च,
भोल सभ्यून ब्बे बब्बुई की, उम्र औण,
वे वक्त कपली पकड़ी , बुकराबुकरि रोण।।

ऐगि पित्र पक्ष पित्रू कू, काक पूड़ि देण कू,
सच्ची पित्र भक्ति कू, झूठा दिखावा कन कू।।

      ःःःःःःःःकल्याण सिंह चौहान ःःःःःः
                 ःःःःःःःःःःःःःःःःःः