हैप्पी नयु साल

 ःःःः हैप्पी नयु साल  (गढ़वली) ःःःः

   ःःःःःःःःःःःःःःःः

बधै देण वलौं कु तांतु लगियूं च,
क्या बोन रूढ़ियों कि सी बाढ़ अईंच,
लगणू सभी अपणा कलेजा सी कत्रि होला।

देखणू कू ही न्यारा न्यारा होला,
जन एकै गौलियू पाणि हैकै गौलि जलु,
जन एकै जुकुड़ि हैकै जिकुड़ि धकधेलि।।

बधै भी कैकि जौंसे हमरू नातु नपातु,
लग्यांं च सभी हैप्पी हैप्पी लेखण मा
विरणा त्यौहारू जबरदस्ति मणौण मा।।

अपणा बार.त्यौहारू कै पता नीच,
चैत शुक्ल प्रतिपदा सनातनी साल शुरू,
हैप्पी होलि, नौरता, जन्माष्टमी, शिवरात्रि लग्या च।।

बग्वाल. इगासा भैला हरचि, हरचि तिलकुटियू बर्त,
हरचि चैतौ पसरु, हरच्या पखंणा,पंवड़ा,
हरच्या थड़या गीत, हरच्या पंडौं का मंडाण।।

सनातनी छां सनातनी रावा,
धर्म रालु त हम रौला, निथर बाटौ सी ढ़ुगेड़ु,
खुटौंन कभी इनै कभी उनै।।

क्वी धर्म बुरु नी, न ऊंका बार त्यौहार मणौणू,
पर अपणा बार त्यौहार न भूला,
बूढ़.बुढ्यों कि चौंठी भुक्कि पेईं,छा दुनिया मा कखि।।

ःःः कल्याण सिंह चौहान ःःःःःः