उ दिन
ःःःः उ दिन - U DIN ःःःः
ःःःःःः
भला बुरा जना भी छा, अच्छा छा उ दिन।
घुमचे-घुमचे स्कूल औणु-जाणू।
स्कूल नि जाणौ ढुंढण बानू।।
भला बुरा जना भी छा, अच्छा छा उ दिन।
पोति-पाती स्लेट पाटी,खूब घोट्या लगाणू।
द्वी एकम द्वी कु पाडू़, जोर जोर से पढ़णू।।
भला बुरा जना भी छा, अच्छा छा उ दिन।
बुवे बब्बू न फिकर छै, हमरी पढ़ै-लिखै की।
न कभी ब्वे-बब्बू, स्कूल औणु जाणू।।
भला बुरा जना भी छा, अच्छा छा उ दिन।
कला छै, कितब्बू जिल्द लगै।
तरतीब से बस्ता सजाणू।
स्कूला सिवै, कभी बस्ता खोली नि देखणू।
भला बुरा जना भी छा, अच्छा छा उ दिन।
लोख्वी मुंगरि कखड़ि चोरी कै, खै जाणू।
मुर्गा बणी, मार खै, कभी नी शर्माणू।।
भला बुरा जना भी छा, अच्छा छा उ दिन।
खै पे, झट से जाणू
पढ़णु आउ नि आऊ, विद्या माता रौ खुश।
मोर पंख, कितब्बू भितर सजाणू।।
भला बुरा जना भी छा, अच्छा छा उ दिन।
घूमि-घूमी सभ्यूं, नया कपड़ा जुता दिखाणु।
समझ नि छै, नि क्वी ब्वे-बब्बू जनु अपणु।।
भला बुरा जना भी छा, अच्छा छा उ दिन।
कल्याण सिंह चौहान
Comments
Post a Comment